عزيزى الانطوائى الصغير

حياة كل واحد فينا دايرة .. و الدايرة مش بتاعته بس .. دى بتتقاطع مع دواير ناس تانية كتير 
حياة كل واحد فينا بتشكل العالم .. وجودك فى حياة أى إنسان و لو عابر .. حتى لو فى صدفة عابرة مش هتتكرر بيغير حياته و حياتك و مسار العالم كله . حياتك مش ملكية خاصة ليك و مش إنت الوحيد المسئول عن أحداثها.. 
اللحظة اللى بتحس فيها بتعاطف مفاجئ مع طلبة ماشيين فى الشارع أو مع حد شفته لأول مرة بس حسيت إنه مضايق و دعوتك ربنا ليهم بالخير هيغير حياتهم .. و هينور حتة فى قلبك .
اللحظة اللى قررت فيها تتغلب على كسلك و خجلك تمد إيدك لست كبيرة شايلة أكياس و مش عارفة تطلع العربية .
الفيلم اللى عمله عدد كبير من الناس .. تعرفهم أو لأ و غير تفكيرك فى حاجة تماما .. غير حياتك و حياتهم .. و الموسيقى و الإضاءة اللى معمولة شبهك و بتحسسك إن فى غيرك بيحس بنفس إحساسك و بيديك طاقة حب للعالم كله .    
 ابتسامتك لحد عمرك ما شفته قبل كده و لا هتتقابلوا تانى يمكن . 
اللحظة اللى قررت فيها تقول للى راكب جنبك فى الميكروباص و عمال يسقط من قلة النوم ينام على كتفك الشوية دول لحد ما توصلوا . 
اللحظة اللى بتصر فيها بياعة المناديل و هى واقفة فى عز الشمس إنك ما ينفعش تديها فلوس من غير ما تاخد كيس مناديل , و القوة اللى بتقويها فى نفسها و بتغرسها فيك .
 اللحظة اللى عرفت فيها إنت بتحب إيه بجد .. و إيه اللى عايز تعيشله حياتك .. هتغير حياتك و هتغير بيها حياة ناس تانيين .
الصلابة اللى بتكتسبها لما تقرر إنك مش هتقول على اللى مضايقك لصاحبك المضايقين من حاجات تانية . و الحب و الإستسلام اللى بتحس بيهم لما صاحبك يطبطب عليك من غير ما تطلب منه . 
اللحظة اللى قررت فيها تعترف لإنسان تانى إنك بتحبه حتى لو ما بادلكش نفس الشعور .. غيرت حياتك و حياته الطريقة اللى كل واحد فيكم بيبص فيها لنفسه .. و للتانى .
السكينة اللى بتحسها وقت ما تغفر للى أساءلك . 
المواساة وقت ما تسمع عن بشر ليهم نفس مشاكلك و جواهم أسئلة كتير زى اللى فى دماغك .
البكاء مع صحبة .. و الضحك فى صحبة .
اللحظة اللى اعترفت فيها إنك محتاج حضن أمك أو صاحبك و ما جريتش عليهم .. و لحظات الندم بعدها.
الوجع اللى لقى اللى يداويه .. و الوجع اللى ما لاقاش .
فى كل لحظة من دول وجودك مع الناس و وجودهم معاك أو غيابك عنهم و غيابهم عنك غير حياتك للأبد .

لا يمكن هتعرف تعزل نفسك عن الناس .. حتى اعتزالك نتيجته عبارة عن تأثير بعد الناس عنك  .. فلو حسبناها بمبدأ مكسب و خسارة تفتكر لو ما حستش كل المشاعر دى و أكتر منها بكتير هتسمى اللى إنت عايشه حياة !

أنا سعيدة

من حوالى سنة كنت عايزة أكتب الكلام ده .. أكيد مش بنفس الصورة بس فى نفس اليوم حصلت مشكلة قفلتنى إنى أكتب عن الموضوع من أساسه :) 
و أدينى رجعت .. بفكر إنه رغم كل اللى بيحصل حوالينا من كوارث و كل الدلائل اللى بتخلينى أتيقن إن الكوارث لسه أوان انتهاءها مجاش ( إيه لازمة وجودى على الكرة الأرضية من الأساس؟ ) .. ما أنا كنت مرتاحة فى اللاشئ ! ..
 قعدت أعد الأسباب اللى بتخلينى مبسوطة و اللى أكيد مكنتش هشوف منها حاجة لو فضلت فى اللاوجود . يمكن الأسباب دى تبان مبتذلة أو مستهلكة من كتر ما الناس حكت عنها بطريقة أو بأخرى بس ده لا يمنع أبدا إنها بتسعدنى و إنى أكيد مش هحاول أتخلى عنها و أراهن إن انتوا كمان كده :)   :- 

1- إنى أشوف الشمس بتشرق

2- إنى أشوفها بتغرب
3- إنى أركب عربية شباكها مفتوح و الهوا الساقع يخبط فى وشى و السماعات فى ودنى بسمع أغنية حلوة
4- إنى أفكر فى إن فى إنسان معانا على الكرة الأرضية جزء من روحه حلو أوى لدرجة إنه يطلع موسيقى حلوة كده
5- إن ربنا خلق ناس بحناجر تطلع أصوات تنعش روحك كل ما تسمعها6- لما أتعلم كلمة جديدة فى لغة مختلفة جدا و أفرح لما أتعرف عليها وسط الكلام
7- لما أقابل صحابى و القعدة تبقى كلها ضحك و تهريج
8- لما أبقى فى لحظة بيستضعفنى فيها صاحب سلطة و رغم الإهانة أحس من جوايا إن ربى هينصرنى . و يكون . اللحظة اللى بحس فيها من غير أى مبرر إن ربنا معايا
9- إحساسى دايما بإن أيا كان اللى جاى ف فيه الخير ليا
10- لما أشوف صورة حلوة
11- لما أشوف حد بحبه
12- لما ينزل عليا فيض من الحب لكل حاجة و سعادة بدون أى مبررات
13- وقت ما بتجنن و أتنطط مع الموسيقى المبهجة
14- لحظة ما أشوف البحر
15- يوم ما أشوف فيلم حلو أو مسلسل يخشوا فى دماغى ميخرجوش و يضحكونى فى وقت ممكن أكون فيه مفعوصة فى الميكروباص و مفيش أى مبرر للضحك
16- لما أفتكر إزاى عدى عليا أوقات كتير صعبة و عدت
17- لما ألاقى حد بيحبنى من غير سبب
18- لما أجرى بأقصى سرعتى و أحس بدقات قلبى و إنى لسه عايشة
19- لما أخرج من إمتحان مبسوطة لأنى أديت كويس
20- وقت ما اتهبل و أبص فى المراية و أقول لنفسى إيه الجمال ده
21- لما أشغل أغنية و أمسك أى حاجة و أقعد أغنى كأنى صاحبة الأغنية أو أعمل نفسى بعزف الجيتار أو البيانو :)
22- لما أفهم حاجة صعبة أو أتعلم حاجة جديدة .ياه ده مخى ليه لازمة مش إكسسوار :)
23- لما أحضن تيتة
24- لما أشوف اللى بحبهم مبسوطين
25- لما أحلم حلم مبهج
26- لما الشتا ييجى
27- وقت المطر
28- أحلامى و الوقت اللى بتخيل فيه مستقبل حلو

29_ إنى بحب الكتابة

30_ إن فى أشخاص مهتمة تقرألى و إن البلوج دى وصل مشاهدتها النهاردة فى لحظة ما بكتب ل 1002 مشاهدة :)

شكرا ليكم و لكل حد أو حاجة هى سبب فى سعادتى .. ممتنة لربنا دايما إنه خلقنى عشان أعرفكم .. تفكيرى بإن ربنا إدانى كل الحاجات دى عشان أفرح بيها رغم إن خبراتى و تجاربى و معارفى مش كتير ده فى حد ذاته إنجاز .. و مين عارف ممكن بعد كام سنة عدد الحاجات اللى بتبسطنى يوصل لكام .

شكرا يا رب
و شكرا ليكم 

عن شجاعة المواجهة ، و عدم اليقين ، و أشياء أخرى

ملحوظة : الكلام ليس غرضه التعميم أو التخصيص أو التلقين . هى مجرد تجارب .

• احنا ما بنعرفش نقبل ابداع حد و هو بيعمل عكسه ف الحياة لأننا بنيقى محتاجين حد نمشى وراه . حد نبقى عارفين إنه قادر يعيش بكل الأحلام و الأفكار و الأمل اللى بيزرعه جوانا بفنه ده فى حياته الطبيعية بكل التحديات اللى فيها . بيخلينا نحس إننا نقدر نعمل زيه ما دام قدر . عشان كده بتيجى الصدمة لما تلاقيه بيخالف اللى انت متوقعه منه ( مع الوضع فى الاعتبار إن اللى انت شايفه صح أو بديهى مش شرط يكون كده فعلا ) . لأنه بيأكدلك الشك اللى كان جواك إن كل الفن اللى بتشوفه و تسمعه و تحسه مجرد كلام على ورق و مش قابل للتنفيذ .

 بس بغض النظر عن الشخص ده و أخلاقه و مواقفه السياسية ، ما دام فنه قدر يخليك تعيش لحظة حلوة و تشوف الدنيا بشكل مختلف و تكتشف شئ جديد جواك فهو كده فعليا عمل اللى عليه . لازم انت اللى تمتلك الشجاعة و المسئولية و تعيش اللى انت مؤمن بيه فى حياتك انت و بأسلوبك انت. 

• إنك تبقى عايز تدخل كلية معينة و الكل ضدك و يوم ما ترضخ و رغم ضيقك فى جزء منك جوا مرتاح إنك ما دخلتش اللى كان نفسك فيه عشان لسه مش عارف تتحمل المسئولية الكاملة و تبعيات قرارك ، عشان مش عارف لسه تلاقى الراحة و الاقتناع الكامل بفكرتك و الكل ضدك ، عشان مش عارف توفر لنفسك الدعم و الأمان اللى بتحسه و انت بتنفذ كلامهم عشان ما تعيش و الكل بيعايرك لو فشلت . كلمة ( مش كنت سمعت كلامنا ) مرعبة . فكرة إن حياتك كان ممكن تبقى مختلفة تماما لو سمعت كلامهم ده مجرد خيال .

و الحقيقة عكس ده تماما : عمر ما سماعك كلامهم هيسعدك ، و عمرهم ما هيتحملوا مسئولية أى فشل فى المجال اللى اختاروهولك و لا هيسهلولك العقبات فيه ، و عدم قدرتك على تحمل مسئولية اختياراتك و فقدانك للأمان طول ما أنت عكس الناس هيزداد مع كل قرار بتاخده ضد إرادتك ، و الأهم إنهم مش هيعيشولك للأبد . هتصبح فى يوم تلاقى عندك ... سنة و عمرك الحقيقى صفر . حققت إيه من أحلامك ... و لا حاجة .

• إنك بتحب أوى لما بوست ليك ع الفيس ياخد لايك كتير . جواك مبسوط إن الناس متفقة معاك . و بتضايق جدا لما محدش يعبرك فى بوست بيحمل فكرة جديدة أو قرار مهم هتعمله أو مبدأ جديد هتعيش بيه . بتخاف لأن اختلافك عنهم هيفقدك الدعم و الأمان اللى بتحس بيه وسط الجموع 

مخدتش بالك إنك لو مشيت مع الكل هتوصل ف الآخر للى هما هيوصلوله . مش اللى انت عايز توصله .

__ __ 

 There's no right answer in life . No one knows if they will be  happy by getting married to someone . Don't look for answers . Right and wrong answers co-exist in every decision . Wise people make a choice and make it the right answer . Foolish people regret the decision and make it the wrong decision .There's no right answer in life . There's only  the process to make it the right answer

( from : Eight words by Park Woong hyun )

السعادة و الحب قرار

 و بعد تفكير فى كام مبدأ هحاول أنفذهم عشان أطور من علاقاتى مع الناس و حبيت أشاركم خلاصة التجربة.. مش شرط تكون صح .. بس ده آخر ما توصلت إليه  :-

1- ما تفترضش سوء النية لحد ما يثبت العكس .

2 - خليك ودود مع الكل . لأنك لما بتبقى فى مواقفهم بتتمنى حد يكون لطيف معاك .

3 - مع ذلك وفر لنفسك مساحة من الخصوصية و الأمان محدش يخترقك فيها .

4 - عامل اللى بتحبهم بتميز على قد ما بتحبهم و بينلهم دايما بأفعالك إنهم مميزين جدا فى حياتك .

5 - مع ذلك ما تتوقعش منهم إنهم يميزوك عشان ما تتوجعش .. إنت بتميزهم عشان بتحبهم .. مش عشان عايز تبقى مميز .

6 -  و اللى بعرفوك عشان مصلحتهم طالما مش بيخترقوا مساحة الراحة اللى خصصتها  لنفسك ..ساعدهم و الأجر على الله . 

7  - و اعرف ازاى تبقى قوى و تقول لأ .. أو تاخد حقك وقت ما تتظلم .

8 - اتبسط بأى حاجة مهما كانت صغيرة . و امتن لربنا على إنك قدرت تشوف فيها الجمال و النعمة

9 - خليك دايما مصدر للطاقة و السعادة .. بكلامك و أفعالك . 
 
10 - و وقت الهم شكوتك لله أولا .. و الفضفضة بس للى هيفهمها .. . 

هذا و بعد كل ده خلى عندك يقين .. إنك هتبقى مرتاح لما تخلص روحك من صراعات ملهاش لازمة بتستنفذ طاقتك و خلاص .. و خليك متأكد إن ربنا دايما هيقف جنبك .. هيساعدك و يقويك .. بإلهام جواك أو شخص يبعتهولك من عنده يريحك و يطمن قلبك .

عنعنات

   

       عن كون الأمنيات معلقة بخيوط واهنة من الأمل .. عن رقة غطاء الثقة و عجزه عن التدفئة .. عن ذلك الضباب الذى يحجب المرآه  فلا أرى ما يجب أن أراه .. عن تلك الوخزات من الحسرة على ما مضى و العجز عن معرفة الآتى .. عن ذلك القلب الذى لا يكف عن تعذيب نفسه بما هو مستحيل يقينا .. عن تلك العلامات التى لا ينفك العقل عن اختلاقها ليطمئننى بأن القادم أفضل ..
عن تلك الأحلام التى لم تتحقق و الرجاءات التى تتضرع كل يوم كى ترى النور ..
عن وجه حلمت به و حين التقيته لم تتجرأ خشيتى على النظر إليه أو الاقتراب منه .. عن قلب مثالى لا أكاد أحلم بالوصول إليه .. عن نقاء أبحث عنه فى النفوس فلا أجد منه إلا القليل .. و عن أمل لا ينتهى فى أن أجد فيضا منه فى أرواح سأقابلها يوما ما ..

إليك رسالتى الأخيرة

     

        فتحت عينىّ على حبى لك .. و اشتياقى إليك كلما بعدت عن ناظرى ..
كنت لى الأمان و المعلم .. و مما يَسّرت لى  .. بنيت تفكيرى .. و صرت كائنا موجودا ..قلبا و روحا و فكرا .. حينها بدأ الإنفصال ..
         لِم ترفض تقبل ما شاركت أنت فى بنائه ؟.. لِم ترفض الإصغاء و التوغل إلى ما وراء الكلمات .. لتدرك ما أعنيه ..لترى الدنيا بعيني فترأف بى .. و تضمنى إلى صدرك و ترعى ما نبت بداخلى بماء حبك.. كيف لا تقبل اختلافنا بصدر رحب !.. كيف لا تدرك أننى لست بصورة منك .. بل كل منا تفاصيل .. تتشارك لتصنع لوحة تفيض سماحة و نقاء و ألقا ..
 و كلما مر الوقت .. يزداد انفصالنا .. تباعُدنا ..تلوث الجزء النقى بداخلى تجاهك .. 
        أتوسل إليك .. بحق كل لحظة بذلت فيها شيئا ما من أجلى .. بكل لحظة رسمت على وجهك فيها بسمة .. فى كل مرة دَعوتَ الله فيها أن يحفظنى .. و دعوتُ الله فيها أن يبقيك إلى جانبى .. ألا تستمر على هذه الحال .. ألا تقطع ما بيننا من خيوط يستميت قلبى فى التمسك بها .. أتوسل إليك .. إن قطع الحبل الأخير فلن أبقَى على شئ .. لن تجد منى سوى التمثيل و التمثيل و التمثيل .. افتعال الحب .. افتعال الشوق ..افتعال الخوف و اللهفة .. ثم أيأس و يتحول الافتعال إلى برود .. و إن تجمد قلبى تجاهك .. فلن يذوب جليده .. إلى أن يفرقنا ما لا قدرة لنا على صدًه ..
 أتوسل إليك .. لا تجبرنى على أن أفقد كل ما خبأته بداخلى من حب لك .. لا تقتل قلبى .. أتوسل إليك ..

نعمة الإدراك

من أهم الكنوز اللى ممكن الإنسان يمتلكها ف حياته هي الإدراك ..إدراك وجود النعمة ف وقتها و شكر ربنا عليها ف لحظتها ..ساعات كتير بتمر علينا بيبقى فيها نعم أكتر كتير من أى تصور ..بس للأسف ساعات برده بيعجز إدراكنا على إدراك العظمة ف النعمة ..إدراكنا بيمارس أكبر غلط لما بيتأخر فى أداء وظيفته ..فى استعياب أهمية اللحظة اللى بيعشها و إنها ممكن تتحول للحظة غنية جدا ..أحيانا بيتسبب إدراكنا فى تفويت كنوز حقيقية علينا ..و للأسف أحيانا إدراكنا لما بيبدأ يقوم بوظيفته تكون النعمة بتتلاشى فعلا و فى طريقها للزوال و يسيبنا فريسة الندم..إزاى الإدراك يكون متوافق مع الزمن و مع الكنوز اللى بينلاقيها ؟ و إزاى نتلافى تضييع الكنوز من بين إيدينا ؟..سؤال معرفش الأجابة عنه ..و أكييد ححاول أفكر فى اجابته و أسأل و أدور و أتمنى إنى أكتشف الإجابة..و مش بعيد أفكر هنا بصوت عالى  ..حنفضل لحد امتى نضيع ف الكنوز ..كان زماننا بقينا مليونيرات :)

خلينى أقول ف الملخص : مكمن السعادة أن تدرك النعمة فى حينها